Sjálfsmat Lindaskóla

Skýrsla 2002

Sjálfsmat Lindaskóla

2000-2002

Inngangur

Samkvæmt lögum um grunnskóla frá 8. mars 1995 er öllum grunnskólum á Íslandi skylt að stunda sjálfsmat.

Sjálfsmat er samvinnuverkefni allra sem koma að starfi hvers skóla. Sjálfsmatsaðferðir eru fjölmargar og hver skóli finnur sér þann farveg sem hentar skólanum.

Sjálfsmat í Lindaskóla

Lindaskóli lagði upp í leit að sjálfsmatsaðferð í ársbyrjun 2000. Sótt voru námskeið hérlendis og í Danmörku og ákveðið var að velja danska aðferð sem við köllum Kaupmannahafnaraðferðina (Kobenhavner-modellen).

Stýrihópur samsettur af stjórnendum og kennurum var skipaður vorið 2000. Í honum voru Gunnsteinn Sigurðsson, Guðrún Soffía Jónasdóttir, Elín Richards, Hulda Björnsdóttir, Hulda Hallgrímsdóttir og Linda Arilíusdóttir.

Steinunn Helga Lárusdóttir lektor frá KHÍ var ráðgjafi stýrihópsins.

Ákveðið var að halda námskeið um sjálfsmat í Lindaskóla í ágúst 2000. Peter Ulholm lektor við DLH/Clue var fenginn var til landsins til að kynna Kaupmannahafnaraðferðina. Námskeiðið var haldið með virkri þátttöku nær allra kennara skólans. Stýrihópurinn annaðist allan undirbúning m.a. val og þýðingar á lesefni sem kennarar fengu í hendur og lásu fyrir námskeiðið (sjá möppu I). Námskeiðið tókst mjög vel og áhugi starfsmanna skólans á verkefninu var mikill.

Kaupmannahafnarmódelið – vinnuferlið

Vinnuferli Kaupmannahafnaraðferðarinnar er á þessa leið:

Valin er ein opin spurning sem í okkar tilviki var: Hvað er góður skóli?

Þátttakendur voru kennarar, starfsfólk, foreldrar og nemendur. Aðferðin byggist á þremur meginskrefum:

· Fyrst er leitað eftir viðhorfum þátttakenda til skóla.

· þá er staða skólans sem um ræðir metin í ljósi þeirra viðhorfa sem fram koma.

· Lokaskrefið er að leita leiða til að bæta það sem kemur í ljós að betur megi fara.

Sjálfsmatsferlið hófst síðan að loknum undirbúningi á fjölmennum fundum þar sem þátttakendum var skipt í hópa og þeir svöruðu spurningunni: Hvað er góður skóli. Allir í hópnum urðu að koma sér saman um sjö fullyrðingar um það hvað einkenni góðan skóla . Einnig þurfti hver hópur að koma sér saman um sjö fullyrðingar um það hvað einkenni góðan skóla af tilbúnum spjöldum (bláum, mappa I) með ýmsum fullyrðingum um góðan skóla sem stýrihópur vann eftir danska efninu og fleiru sem þótti henta aðstæðum Lindaskóla (sjá möppu I).

Þetta verkefni var tekið fyrir á vinnufundi með kennurum 11. október 2000. 36 af 42 kennurum skólans mættu á fundinn.

Foreldrar voru síðan boðaðir eftir árgöngum 23. –26. október. Alls mættu 111 foreldrar.

Fulltrúar foreldra tóku einnig þátt í störfum stýrihópsins, Hjördís Magnúsdóttir og Logi Sigfinnsson.

Eftir þetta hugstormunarferli vann stýrihópur spurningalista upp úr fullyrðingum hvers vinnuhóps (sjá möppu III). Það ferli tók langan tíma eða frá því í nóvember og alveg fram á nýtt ár.

Starfsmenn aðrir en kennarar unnu svo að sjálfsmatinu á sama hátt þann 25. janúar 2001.

Niðurstöður af fullyrðingaspjöldunum þ.e. hvað einkenni góðan skóla voru sameinaðar í spurningalista (sjá möppu III). Spurningalisti fyrir foreldra var sendur til þeirra fyrir jól ásamt bréfi frá skólastjóra (sjá möppu III).

Spurningalisti kennara og annarra starfsmanna var sameinaður í einn. Spurningalistinn byggði á fullyrðingum um hvað einkenni góðan skóla og honum dreift til kennara og starfsmanna í febrúar 2001 (sjá möppu III). Spurningalistanum var skilað fyrir lok febrúar.

Þann 5.-9. febrúar var unnið að sjálfsmati með nemendum. Var lagt upp með sömu spurningu og hjá starfsmönnum, kennurum og foreldrum þ.e. Hvað er góður skóli?

· Yngstu börnin í 1. –4. bekk tjáðu sig myndrænt og skriflega.

· Nemendur í 5.-9. bekk tjáðu sig eingöngu skriflega.

· Nemendur í 8.-9. bekk unnu einnig með fullyrðingar af bláu spjöldunum.

Umsjónarkennarar stýrðu vinnuferlinu eftir skipulagi sem stýrihópurinn samdi. Taka skal fram að þar sem Lindaskóli er ungur skóli var ekki 10. bekkur þennan vetur (sjá möppu III – sýnishorn af vinnu nemenda).

Rannsóknardeild KHÍ var fengin til að vinna úr spurningalistunum frá kennurum, starfsmönnum og foreldrum. Niðurstöður sem fram komu hjá nemendum voru teknar saman og var listaðar upp eftir árgöngum, forgangsraðað var eftir því hversu oft hvert atriði kom fyrir hjá nemendum.

Niðurstöður voru svo kynntar á þessa leið:

· Helstu niðurstöður og framkvæmdaáætlun var kynnt foreldurum.

· Allar niðurstöður kynntar stýrihóp og foreldraráði.

· Kennurum kynntar niðurstöður úr kennarahlutanum.

· Helstu niðurstöður úr foreldrahluta kynntar kennurum.

· Sett var niður umbótaáætlun og hún kynnt öllum.

Í lok apríl 2001 komu drög að niðurstöðum úr spurningalistum frá kennurum, starfsfólki og foreldrum sem unnin voru af Amalíu Björnsdóttur professor í aðferðafræði við KHÍ KHÍ (sjá möppu III).

Þann 17. maí var haldinn fundur með kennurum, starfsmönnum, foreldrum, stjórn foreldrafélagsins, bekkjarfulltrúum og nemendaráði. Fræðslustjóri var einnig boðaður en mætti ekki.

Á þessum fundi voru niðurstöður kynntar og var dagskrá fundarins eftirfarandi:

· Gunnsteinn Sigurðsson skólastjóri rakti vinnuferli sjálfsmatsins.

· Amalía Björnsdóttir kynnti niðurstöður kennara, starfsmanna og foreldra.

· Elín Richards sagði frá niðurstöðum nemendavinnunnar.

· Hjördís Magnúsdóttir og Logi Sigfinnsson reifuðu málið út frá sjónarhóli foreldra í stýrihópnum.

· Steinunn Helga Lárusdóttir tók saman niðurstöður.

· Í lok fundar voru fyrirspurnir og umræður.

Vinna við sjálfsmatið lá niðri fram í október 2001. Þá voru gerðar breytingar á stýrihópnum. Guðrún Soffía var í námsleyfi, Hulda Björnsdóttir og Elín Richards héldu áfram veru í stýrihóp en nú sem stjórnendur. Nýir kennarafulltrúar komu inn þær Elsa Sif Guðmundsdóttir og María Paloma Ruiz Martinez.

Stýrihópurinn var fljótur að setja sig inn í málin á nýjan leik og var hafist handa við að skipuleggja næsta vinnuferli, sem var gerð umbótaáætlunar. Mikið var rætt í hvaða formi slík áætlun gæti verið. Að lokum var ákveðið að leggja þá þætti sem betur mættu fara fyrir starfsmenn skólans og foreldra.

Stýrihópurinn flokkaði niðurstöður úr spurningalistum kennara og starfsfólks í umbótaáætlunina (sjá möppu III). Tekið var mið af því hvort eitthvað hefði áunnist eða verið breytt til betri vegar frá því listarnir voru unnir.

Helstu atriði sem þótti rétt að athuga nánar voru:

· Vinnuaðstaða

· Skólaskrifstofa

· Öryggismál

· Boðleiðir og upplýsingar

· Reglur

· Hlutverk starfsmanna

· Umgengi

· Samstarf nemenda

· Námskeið

· Gagnkvæm virðing

· Heitur matur

Haldin voru vinnukvöld með kennurum og starfsfólki þar sem farið var yfir þau atriði sem voru í umbótaáætluninni. Var öllum skipt í hópa, hver hópur fékk afmarkaða fullyrðingu s.s vinnuaðstöðu og átti hópurinn að koma fram með hugmyndir um mögulegar umbætur. Var slíkt hið sama gert 11. apríl með foreldrum. Stýrihópurinn tóksaman og fór yfir niðurstöður þessarra tveggja vinnukvölda (sjá möppu III). Upp úr þeirri vinnu var unnin nákvæm aðgerðaáætlun þar sem fram kom hvað þyrfti að gera, hver ætti að sinna því og fyrir hvaða tíma (sjá möppu III). Sumt er komið til framkvæmda, annað verður unnið með skólaárið 2002-2003. Einhver atriði í aðgerðaáætlun þurfa sífellt endurskoðunar við.

Lokaorð

Í janúar 2002 kom bréf frá Menntamálaráðuneytinu þar sem fram kom að gerð yrði úttekt á sjálfsmati Lindaskóla. Fulltrúar frá Rannsóknarstofnun Kennaraháskóla Íslands sáu um úttekt á framkvæmd sjálfsmats og sjálfsmatsaðferð Lindaskóla fyrir Menntamálaráðuneytið.

Niðurstöður liggja fyrir og eru Lindaskóla mjög í hag. Samkvæmt þeim viðmiðum sem ráðuneytið setur um sjálfsmat, telst sjálfsmatsaðferð skólans fullnægjandi. Framkvæmd sjálfsmatsins telst líka fullnægjandi. Niðurstöðurnar eru birtar í heild á heimasíðu Lindaskóla.

Hægt er að fræðast um sjálfsmat Lindaskóla á heimasíðu skólans www.lindaskoli.kopavogur.is en einnig hefur reglulega verið skýrt frá framgangi sjálfsmatsins í fréttabréfi skólans.

Lindaskóli 17. október 2002

Elín Richards

Elsa Sif Guðmundsdóttir

Guðrún Soffía Jónasdóttir

Gunnsteinn Sigurðsson

Hulda Hallgrímsdóttir

Linda Arilíusdóttir

Paloma Ruiz Martinez