Úttekt á sjálfsmatsaðferðum í Lindaskóla vorið 2002

Úttekt á sjálfsmatsaðferðum í Lindaskóla var í höndum RKHÍ og unnin á tímabilinu febrúar–apríl 2002.

Eftirfarandi eru meginniðurstöður úttektarinnar:

Staða sjálfsmats

Skrifleg og opinber verkáætlun um sjálfsmat liggur fyrir. Kerfisbundið sjálfsmat hefur farið fram Staða sjálfsmats í skólanum. Sjálfsmatsskýrsla hefur verið gefin út.

Nei Já Kerfisbundið sjálfsmat hefur farið fram á öllum helstu þáttum skólastarfsins Er í vinnslu

Sjálfsmatsaðferðir

Eftirfarandi eru niðurstöður varðandi það hvort sjálfsmatskerfi Lindaskóla uppfylli þau viðmið sem menntamálaráðuneytið hefur sett um sjálfsmatsaðferðir.

Sjálfsmatskerfið telst:
Formlegt	Já
Altækt	Já
Áreiðanlegt	Já
Samstarfsmiðað	Já
Umbótamiðað	Já
Árangursmiðað	Já
Stofnanamiðað	Já
Einstaklingsmiðað	Já
Lýsandi	Nei
Greinandi	Já
Opinbert	Nei

Heildarniðurstaða

Samkvæmt viðmiðum ráðuneytisins teljast sjálfsmatsaðferðir skólans:	fullnægjandi
Framkvæmd sjálfsmatsins telst	fullnægjandi

Greinargerð úttektaraðila

Lindaskóli er að ljúka öðru ári í skipulegu matsferli, eða ljúka hringnum með fyrstu spurninguna eins og það er orðað í stýrihópi sjálfsmatsins. Ferlið byggir á svonefndu Kaupmannahafnarlíkani sem Peter Ulholm, lektor við DLH er einn upphafsmanna að. Hann kom hingað og var aðalleiðbeinandi á sjálfsmatsnámskeiði í Lindaskóla í ágúst 2000. Í framhaldinu hafa þátttakendur í sjálfsmatinu unnið eftir þessu líkani einkum með því að nýta aðferðafræðina en mótað innihald og áherslur í sjálfsmatinu eftir eigin þörfum.

Sjálfsmatið í Lindaskóla nær vel til allra helstu aðila skólastarfsins. Þó er skólaskrifstofan undanskilin og hafa starfsmenn þar ekki þekkst boð um kynningu á því sem fram hefur komið um samskipti skólans og skrifstofunnar.

Líkanið sem stuðst er við er einskonar grasrótarlíkan þar sem áherslur í gildismati (forsendur/viðmið), við gagnaöflun og gerð umbótaáætlunar eru afrakstur hópavinnu. Vel hefur tekist að virkja til þáttöku alla starfsmenn skólans og stóran hóp foreldra. Á árinu 2000–2001 var mest unnið að mótun matsspurninga og gagnasöfnun undir yfirskriftinni: Hvað er góður skóli? Veturinn 2001–2002 ghefur verið unnið að gerð umbótaáætlunar, einnig með virkri þáttöku allra starfsmanna og foreldra. Einnig hafa stjórnendur og starfsmenn unnið að beinum úrbótum í ljósi niðurstaðna (t.d. matarmál, agamál, umgengnisreglur, samskipti kennara og alm.stm.) Fram kom í viðtölum við starfsmenn og foreldra að almenn ánægja ríkir með það að sjálfsmatið skilaði niðurstöðum fljótt og brugðist væri við með úrbótum eða ákvörðunum, með tilteknum viðmiðum, í umbótaáætlun.

Gagnaöflun náði einnig til allra nemenda og mat þeirra hefur verið nýtt m.a. við val á forgangsverkefnum s.s. að hraða skólamáltíðum fyrir börn á miðstigi. Skipuleg úrvinnsla á mati nemenda er þó skemmra á veg komin og niðurstöður hafa ekki verið kynntar í nemendahópnum. Hins vegar hafa önnur matstæki verið notuð í nemendahópi til hliðar við Kaupmannahafnarlíkanið; eineltisteymi skólans mæltist til að gerðar yrðu tengslakannanir í öllum bekkjum, könnun á óskum um tómstundastarf var gerð á miðstigi og einstaka kennarar hafa lagt fyrir könnun um líðan og samskipti í bekk. Jafnframt má nefna greiningarvinnu á niðurstöðum samræmdra prófa í stærðfræði í 4. bekk.

Sjálfsmatið, vinnubrögð og helstu niðurstöður voru kynntar í fréttabréfi sl. vor. Þeir foreldrar sem hafa tekið þátt í sjálfsmatsfundum í vetur hafa einnig fengið kynningu á framvindunni í vinnuferlinu. Aðgengilegt kynningarefni fyrir aðra um sjálfsmatið, t.d. um niðurstöður og næstu skref, hefur ekki verið gefið út í vetur né heldur birt á heimasíðu skólans og þar er reyndar ekkert minnst á þetta stóra verkefni.

Sjálfsmatsáæltun eða yfirlit yfir verkefnið liggur ekki fyrir á prenti enn. Starfsmenn skólans virðast þó vel heima í vinnuferlinu og afrakstrinum sem þegar er. Í undirbúningi er skýrsla um fyrsta tveggja ára hringinn í sjálfsmatinu sem hefur farið fram undir yfirskriftinni: Hvað er góður skóli? Skýrslan mun verða opinber og væntanlega liggja fyrir í sumar með umbótaáætlun og tillögu eða ákvörðun um aðalspurningu fyrir næsta hring í sjálfsmatsferlinu.

Athygli vekur hve mikil samstaða hefur náðst um sjálfsmatsverkefnið. Það hefur skapað ánægju og ríka samkennd meðal starfsmanna skólans og þannig náð að verða virkt tæki í skólaþróun og uppbyggingarstarfi. Meðal foreldra virðist einnig vera almenn ánægja með verkefnið og af viðtölum við fulltrúa foreldra má ráða að þeir vænta góðs af því að foreldrar fái að taka virkan þátt í uppbyggingu skólastarfsins með þessum hætti.